ಏಳನೇ ವಿಶ್ವ ಕನ್ನಡ ಸಾಂಸ್ಕೃತಿಕ ಸಮ್ಮೇಳನ ಈ ವರ್ಷ ಸಿಂಗಪೂರಿನಲ್ಲಿ ಭರ್ಜರಿಯಾಗಿ ನಡೆಯಿತು, ಸುಮಾರು ಮುನ್ನೂರಕ್ಕೂ ಹೆಚ್ಚು ಕಲಾವಿದರು ಕರ್ನಾಟಕದ ವಿವಧ ಭಾಗಗಳಿಂದ ಬಂದು ಸಿನ್ಗನ್ನಡಿಗರಿಗಾಗಿ ಒಂದು ಚಿಕ್ಕ ಕರ್ನಾಟಕವನ್ನೇ ಚೊಕ್ಕದಾದ ಸಿಂಗಪೂರಿನಲ್ಲಿ ಸೃಷ್ಟಿಸಿದರು! ಹಲವಾರು ಪ್ರಾಯೋಜಕರು, ಸಿಂಗಪೂರ್ ಕನ್ನಡ ಸಂಘ ಹಾಗು ಹೃದಯವಾಹಿನಿ ಪತ್ರಿಕೆಯ ಆರ್ಥಿಕ ಮತ್ತು ಹೃತ್ಪೂರ್ವಕ ಸಹಕಾರದಿಂದ ನಡೆದ ಈ ಅದ್ಭುತ ಹಬ್ಬ ವೀಕ್ಷಕರ ಕಣ್ಣಿಗೆ ಕನ್ನಡದ ಬಹುರೂಪವನ್ನು ಮರೆಯಲಾರದಂತೆ ಅಚ್ಚಳಿಯುವ ಹಾಗೆ ನಿರ್ಮಿಸಿತು.
ಕೇವಲ ಎರಡೇ ದಿನಗಳಲ್ಲಿ ನಮ್ಮ ಸಂಸ್ಕೃತಿ, ಇತಿಹಾಸಗಳನ್ನು ಎತ್ತಿ ಹಿಡಿಯುವುದು ಅಸಾಧ್ಯ, ಆದರೂ ಈ ಪ್ರಯತ್ನ ಶ್ಲಾಘನೀಯ. ಹಲವಾರು ಕನ್ನಡದ ದಿಗ್ಗಜರು ಅರಿವಿನ ಮಾತುಗಳನ್ನಾಡಿ ಇಂಥಹ ಒಂದು ಸಮ್ಮೇಳನ ಕನ್ನಡಕ್ಕಷ್ಟೇ ಸೀಮಿತವಾಗದೆ ಎಲ್ಲ ನಾಡಿನ ಎಲ್ಲ ಸಂಸ್ಕೃತಿಗೂ ಅತ್ಯಾವಶ್ಯಕ ಎಂಬ ಸತ್ಯವನ್ನು ಪುನರುಚ್ಚರಿಸಿದರು. ಕಾರ್ಯಕ್ರಮವು ಹಲವಾರು ಮುಖಗಳನ್ನು ಹೊತ್ತು ತಂದು ಆದಿಯಿಂದ ಅಂತ್ಯದವರೆಗೂ ಸಫಲತೆಯ ಫಲವನ್ನು ತನ್ನದಾಗಿಸಿಕೊಂಡಿತು. ಅಂತ್ಯವಿರದಿರಲಿ ಎಂಬುದು ನನ್ನ ಆಸೆ ಹಾಗು ನಂಬಿಕೆ.
ಪದ್ಮಶ್ರೀ ಕದ್ರಿ ಗೋಪಾಲ್ನಥರ ಶಃನಾಯಿಯಿಂದ ಹೊರಹೊಮ್ಮಿದ ಜಯ ಭಾರತ ಜನನಿಯ ತನುಜಾತೆ ಇಂದ ಪ್ರಾರಂಭಗೊಂಡ ಸಮ್ಮೇಳನ ಚಪ್ಪಾಳೆಯ ಸುರಿಮಳೆಯಷ್ಟೇ ಅಲ್ಲದೆ ಜನರನ್ನು ಆಸನಗಳಿಂದ ಎದ್ದು ನಿಲ್ಲಿಸಿ ಕನ್ನಡಮ್ಮನಿಗೆ ಗೌರವ ಸಲ್ಲಿಸುವಂತೆ ಮಾಡಿತು, ಮೈನವಿರೀಳಿಸಿತು!
ಸಂಘದ ಅಧ್ಯಕ್ಷರಾದ ಡಾ|| ವಿಜಯ ಕುಮಾರರು ಸಭೆಯ ಮುಖ್ಯ ಅತಿಥಿಗಳಾದ ಬರಗೂರು ರಾಮಚಂದ್ರಪ್ಪನವರನ್ನು ಹಾಗು ಆಹ್ವಾನಿತರಾದ ಮುಖ್ಯಮಂತ್ರಿ ಚಂದ್ರು, ಮಂಜುನಾಥ ಸಾಗರರನ್ನು ಉದ್ಘಾಟನಾ ಸಮಾರಂಭಕ್ಕೆ ಬರಮಾಡಿಕೊಂಡರು. ದೀಪವನ್ನು ಬೆಳಗಿದ ನಂತರ, ನಾಡಗೀತೆಯೊಂದಿಗೆ ಸಮ್ಮೇಳನ ಭರ್ಜರಿಯಾಗಿ ಮುಂದುವರೆಯಿತು. ಭಾಷಣಗಳು, ಲಘು ಉಪಹಾರ, ಬಣ್ಣ ಬಣ್ಣದ ಮಳಿಗೆಗಳು ಜನರನ್ನು ಕಟ್ಟು ಹಿಡಿದಿದ್ದವು!
ಶ್ರೀಮತಿ ಸಾಧನಾ ರಾಜಾರಾಮ್ ನಿರ್ದೇಶನದ ಕೃಷ್ಣ ನೃತ್ಯ ರೂಪಕವು ಅದ್ಭುತವಾಗಿ ಮೂಡಿ ಬಂದಿತು. ಸಿಂಗಪೂರದಲ್ಲಿ ಉನ್ನತಿ ಪಡೆದ ಗಣ್ಯರನ್ನು ಆದರದಿಂದ ಸನ್ಮಾನಿಸಿ, ಮೊದಲನೇ ದಿನದ ಕಡೆಯ ಕಾರ್ಯಕ್ರಮವಾದ ಸಂಗೀತ ಸೌರಭವು ಸರಾಗವಾಗಿ ರಂಜಿಸಿದ ಬದರಿ ಪ್ರಸಾದ್ ಹಾಗು ಅನುರಾಧ ಭಟ್ ಅವರ ಸುಮಧುರ ಕಂಠಗಳೊಂದಿಗೆ ಸಂಪೂರ್ಣವಾಯಿತು.
No comments:
Post a Comment